Lacasandile killing: Cross-matching ti paltog ti suspek iti narekobre a kapsula iti crime scene, agparis

VIGAN CITY – Naaramat ti paltog a nakumpiska iti maysa kadagiti armado a lalaki a natiliw iti pagpallotan ti San Gabriel, La Union iti pannakapapatay ti hues ti Regional Trial Court ti Vigan City, daytoy ti resulta ti cross matching a naiwayat iti paltog ken ti kapsula a nasa-rakan dagiti inbestigador iti crime scene a nakapaltogan ti nasao a hues.

Gapu iti daytoy a development, manamnama ti pannakaited ti hustisia ken ni Vigan City Regional Trial Court Judge Reynaldo Lacasandile a napapatay idi parbangon ti Oktubre 4 iti Barangay Lacong, Tagudin, Ilocos Sur.

Tiniliw dagiti otoridad da Peter Reyes Tagura, 52, ken ni Candido Almazan Mitrado, 49,  gapu iti panagikutda iti paltog iti uneg ti maysa a pagtatadian iti manok iti San Gabriel, La Union idi Hunio 9.

Nakumpiska iti ikut dagiti suspek ti dua a cal. 45 ket segun iti resulta ti cross matching kadagiti paltog, napatalgedan a ti paltog a nakumpiska iti ikut ni Mitrado ti nagtaudan ti kapsula a narekobre iti lugar a nakapapatayan ni Lacasandile.

Kinuna ni National Police spokesman Chief Supt. Agrimero Cruz, Jr. nga umdas nga ebidensia ti resulta ti ballistics examination a mangipideg kadagiti dua a suspek idinto nga innayonna nga adda dagiti saksi a mangpaneknek a sinurot dagitoy ni Judge Lacasandile sakbay a mapaltogan.

Agur-uray ni Lacasandile iti luganna nga agpa-Vigan City  iti igid ti national highway a sakup ti nadakamat a barangay idi agarup 4:45 ti parbangon ti Oktubre 4 idi pinaltogan ti dua nga armado a tattao a nagkalubbon iti motorsiklo.

Saanen a naidanon ti biag ti hues iti ospital a nakaitarayanna.

Mapapati a work-related ti motibo ti pannakapapatay ni Lacasandile. Mapattapatta nga adda aganay 600 a kaso ti droga nga iggem ni Lacasandile idi mapapatay.

Maipalagip a nabuangay ti Task Force Lacasandile a binukel ti Criminal Investigation and Detection Group (CIDG), Crime Laboratory Service (CLS), Regional Intelligence Division (RID), Regional Investigation and Detective Management Division (RIDMD), ken ti Tagudin police station a mangisayangkat iti naun-uneg nga inbestigasion para iti madagdagus a pannakasolbar ti pannakapapatay ni Lacasandile.

Kanaig daytoy, kinuna ni  Cruz a  kiniddawdan iti National Bureau of Investigation ken ti Task Force Lacasandile ti panangiramanda kada Mitrado ken Tagura iti charge sheet iti pannakapapatay ti hues.

Sakbay ti pannakatiliw da Mitrado ken Tagura, adda sumagmamano a suspek a pinilaan ti NBI iti kaso a murder a pakaibilangan da Benson Sudario, Rodrigo Urmin, Henry Galapate ken maysa nga agalias iti “Temy” ken tallo a di nainaganan a kakaduada.

Simmuko iti NBI ni Urmin, mapapati a drayber iti motorsiklo a naaramat iti pannakapapatay ni Lacasandile ken miembro iti drug ken gunrunning activities, idi Nobiembre idi napan a tawen ket intudona ni Sudario a nangrekrut kenkuana.

Maipagarup a rinekrut da Sudario, Galapate ken ni Temy ni Urmin mainaig iti mapapati a planoda a mangpapatay ken ni Lacasandile.

Ngem iti baet nga addan kinasuan ti NBI, intultuloy ti Task Force Lacasandile ti nagimbestiga mainaig iti nasao ket iti pannakatiliw da Mitrado ken Reyes, manamnama ti naan-anayen a pannakasolbar ti pannakapapatay ti hues.#