Lakasa

Ni Imelda Castro-Rivero

Ni Jesus kinunana kadakuada: Ti taraonko isu ti panangaramidko iti pagayatan ti nangibaon kaniak, ken panangturposko ti aramidna” (Juan 4:34).

ITI pananglukatko iti lakasa ni lelang iti maysa a Domingo, pagammuan lattan ta nakitak iti maysa a suli ti maysa a supot a naaramid iti kadaanan nga abel a nagmaris iti berde nga adda bassit amarillo ken kolor tsokolatena. Adda ngata sangadangan a kaatiddog ti supot ket idi alaek, ay, nagdagsen! Kumilingkiling. Pinaruk-atak ti nangtengngel iti ngiwat ti supot a lubid a maris gatas. Nagadu a sensilio! Imbukbukko iti datar. Sagsisiping. United States of America ti naimaldit iti bangir, ket adda ti agila a simbolo ti Amerika

Nakita dagiti annakko daytoy a supot ket nagiriagda nga immay nangay-ayam kadagiti sagsisiping. Saanen a mabalin a paggatang dagitoy, mama, kuna tay inauna. Amman, mabalin pay, kuna met tay inaudi. Idi, adun ti magatangna dayta, kuna met ni nana Trining a kaduak nga agdaldalus. Wen, kunak met. Ngem tatta, uray no rinibu ti kuartam bassit met ti magatangna.

Iti panangbidingbidingko kadagiti sensilio immay kaniak dagiti kanito idi agtawenak ngata iti pito a kanayonak nga aguk-ukag kadagiti lakasa ken aparador. Maay-ayoak kadagiti makitkitak a naggianna. Uray no ordinario laeng a lubid, ayna napintas! Kaniak idi, dagiti masukisokko a suli wenno kuarto ti balay ket kas maysa a nakaikabilan dagiti gameng, ngem iti naganus a panunotko idi, gameng amin a makitak a diak pay nakitkita.

Gameng nga agpayso dagitoy. Parteda ti kulturatayo. Ket ania man a pakalaglagipan iti napalabas agbalinen a paset ti kulturatayo. Ta ti kultura, kas panangilawlawag ni manang Fran Quitoriano ket inna laonen ti napalabas, ti agdama ken ti masanguanan.

Daytoy ngarud lakasa ti biag tay paguk-ukagantayo kadagiti gameng ti kulturatayo. Ngem ti Nasantuan a Biblia pay laeng ti kadakkelan a lakasa. Inted daytoy a gameng – kangrunaan a gameng ti biag – ti Namarsua tapno saantayo a maiyaw-awan iti panagdaliasattayo nga inaldaw kadaytoy agdama a biag.

Gapu iti naindaklan nga ayat ti Dios kadatayo, intedna met ti Anakna a mangisalakan kadatayo. Iti lakasa ti biag, manipud naiyanaktayo inggana a dimmakkel ken addaantayo iti pamilia, nariknatayo ken nakitatayo no kasano kadakkel ti panagayat ti Dios kadatayo.

Kadagiti tiempo nga adayo ti ragsak, kadagiti tiempo a kasla nagrigat ti umisem ken agpaggaak, gapu ta kasla nagdagsen unay ti aw-awitentayo tay agsennaay ken agkararag ket ti laeng mapanunottayo. Saan kadi nga ad-adda a mariknatayo ti bileg ti Dios kadagitoy a tiempo?

Wen, naindaklan nga agpayso ti ayat ti Dios, ta uray no ingget ti kinasukirtayo, adda la a mangtartarabay kadatayo nga inaldaw. Uray no agtutuon dagiti basoltayo, adda ti Dios nga agur-uray iti tiempo nga intayo tumangad Kenkuana, nga intayo dumawat iti pammakawanna, ket intayo rugian a daliasaten ti dalan ni panagbabawi ken panagbalbaliw.#