Lakay, naaresto gapu iti kaso a lasciviousness

SAN EMILIO, Ilocos Sur – Laklakayanen ti suspek ngem gapu iti mapapati a kinaderrepna, pinaaresto ti maysa a korte sadiay Narvacan itay nabiit tapno sungbatanna ti naisaklang a kaso maikontra kenkuana.

Inaresto dagiti polis ni Pedro Reyes, Jr. y Balbin, 75, residente iti Barangay Sibsibbu ditoy nga ili babaen ti bileg ti warrant of arrest nga inyisiio ni Judge Sicto D. Diompoc ti Regional Trial Court, Branch 72, Narvacan, Ilocos Sur.

Sumangsango ni Reyes iti kaso a lascivious conduct a nai-docket iti babaen ti Criminal Case No. 3809-N ket nairekomenda nga agpiansa iti P80,000.00 para iti temporario a wayawayana.

Iti pannakaisurat daytoy, naikustodia ti suspek iti police station ditoy para iti dokumentasion ken umisu a disposision.#