Lakay, nadisnog bayat Pacquiao-Marquez fight, DOA iti ospital

BANAYOYO, Ilocos Sur – Pimmusay iti ospital a nakaitarayanna ti maysa a lakay  a nadisnog gapu iti riri bayat ti panagboksing da Pacquiao ken Marquez idi Nobiembre 13.

Immuna a naitaray gapu iti sugatna iti ulo ni Carlos Garrega y Polonio, 61, naasawaan, ken residente iti Barangay Bagbagotot ditoy nga ili iti Candon General Hospital sa naiyalis iti Ilocos Training Regional Medical Center iti San Fernando City, La Union ngem pimmusay iti nasao nga ospital idi agarup 2:00 ti bigat ti Nobiembre 15.

Naammuan iti report manipud iti police station ditoy nga ili a naggiinom da Garrega, ti suspek a nainaganan iti Danilo Cudiamat y Soriano, residente met laeng iti nadakamat a barangay; ken dadduma pay a kakaduada bayat ti panagbuyada iti panagboksing da Pacquiao ken Marquez iti mismo a pagtaengan ti suspek.

Mapapati nga adda naparnuay a saan a panagkinnaawatan iti nagbaetan da Cudiamat ken ni Garrega ket dinanog ti suspek ti barukong ti lakay a puon ti nakatumbaan daytoy ket naitupa ti ulona iti pavement ti kalsada.

Naipaautopsia ti biktima iti PNP Crime Lab, Regional Office 1.#