Lakay, nadungpar iti motorsiklo, natay

SANTIAGO, Ilocos Sur – Naideklara nga awanen ti biag ti maysa a lakay iti ospital a nakaitarayanna kalpasan a dinungpar ti motorsiklo sadiay Barangay Olo-olo Norte ditoy nga ili idi rabii ti Agosto 13.

Segun iti police report, magmagna ti di pay nabigbig a lakay a mapattapatta nga agtawen iti 75-80 iti lauden a paset ti national highway a sakup ti nadakamat a barangay idi agarup 11:55 ti rabii ti Agosto 13 idi dinungpar ti Loncin motorcycle a minaneho ti maysa nga Amante Cresbert Quintinita y Dacion, 18, baro, ken residente iti Barangay Poblacion, Galimuyod, Ilocos Sur.

Mapapati nga indarusdos ti motorsiklo ti biktima iti agarup 20 metro manipud iti nakadungparanna a puon ti nakatayanna.

Awan ti puot ti drayber ti motorsiklo idi naitaray iti ospital ken mapapati nga adda iti inpluensia ti arak.#