Lakay, nagbilin sakbay a kinettelna ti bagina

TAGUDIN, Ilocos Sur – Sakbay a nagbekkel, nagbilin pay daytoy biktima iti anakna iti aramidenda iti pannakaimassayagna.

Segun ken ni Roderick Somera y Lardizabal, 21, baro, binilin ti amana a ni Viollito Somera y Ringor, 57, naasawaan, mannalon, nga ipabayona diay irikda tapno adda maipakan kadagiti makilamay kenkuana.

Kinuna ni Roderick nga idi inayabanna ti amana a manganda idi agarup 11:00 ti rabii ti Oktubre 16, imbaga ti lakay a mangan lattan agsipud ta matayton iti kabigatanna gapu ta awan met la serbi ti panagbiagna.

Kabigatanna, nasarakan ti lakay iti kuartona a maysan a bangkay, natalian ti tengngedna ken naigalut iti tuktok ti kusinada.

Mapapati a malaksid a nagbekkel, imminom pay ti lakay iti sabidong kas maibatay iti awan naggianna a plastik a botelia ti Machete Herbicide ken baso a plastik a mapapati a naginomanna ken kaadda iti labutab iti ngiwatna.#