Lakay, tinagbat ti padana a lakay

SUYO, Ilocos Sur – Adda pagsasao a: No lumakay ti maysa a tao, lumaglagda. Ngem iti daytoy nga insidente, saan a nagbalin dagitoy dua a lakay nalagda wenno naamnut no di ket nagbalinda a laglag ta intulokda a parmeken ida ti arak.

Iti report manipud iti polis ditoy, binagsol ni Vicente Ancheta y Rante, 77, balo, ken residente iti Sitio Baudan, Barangay Man-atong, Suyo, ti kalugaranna a ni Rosendo Iban, 61, naasawaan, gapu iti dida panagkinnaawatan bayat ti panaggiinomda idi malem ti Hulio 28 iti balay ti suspek, kaduada ti maysa nga Edgar Iban y Dangpit, 39, baro, ken natibo iti Barangay Bangao, Buguias, Benguet.

Mapapati a gapu iti panagsubang ti suspek ken ti biktima, pimmanaw ni Rosendo Iban ngem nagsubli a nakaiggem iti bolo sana tinagbat ti makannigid a pungupunguan ni Vicente Ancheta.

Tinaray met ni Ancheta ti bolona ket tinagbatna ti ulo ni Iban.

Naitaray ni Iban iti Tagudin Hospital and Capiliariasis Center idinto a boluntario a simmuko ni Ancheta iti polis.#