Lako a nabungbongan nga ikan, nakumpiska

STO. DOMINGO, Ilocos Sur – Nasurok a duapulo ket pito a kilos a nabungbong nga ikan a mailaklako iti tiendaan publiko ditoy nga ili ti sinamsam dagiti nagtipon a bunggoy dagiti polis ken personnel ti Bureau of Fish And Aquatic Resources idi bigat ti Enero 19.

Nagtitipon ti PNP personnel ti 103rd Maritime police a nakabase iti Barangay Mindoro, Vigan City nga indauluan ni PSI Allan Kibatay Sison, ti Sto. Domingo police station nga indauluan ni PCI Honesto T. Lazo, Jr., agraman da Benedicto Saraos y Llanes, regulatory officer ti BFAR, Ilocos Sur, SBM Henry Palpallatoc, chairman ti committee on public market, ken Jose Randy Reburon ti Fisheries ti Sto. Domingo a nangisayangkat iti nasao nga operasion iti tiendaan publiko iti dayta nga aldaw.

Ngem nagtataray dagiti aglaklako kadagiti nabungbongan nga ikan idi nasaepda ti isasangpet dagiti polis ket nabati ti lakoda a sumurok kumurang 27 kilos nga agduduma nga ikan.

Positibo a nabungbongan dagiti ikan, segun iti panageksamen ti taga-BFAR.#