Lalaki a biktima iti salvage, nabigbigen

SUYO, Ilocos Sur – Nabigbigen ti lalaki a nasarakan a bangkay iti rangkis sadiay Sitio Man-ubac, Barangay Man-atong ditoy nga ili idi malem ti Marso 26.

Binigbig ti maysa nga Aguinaldo Manzolin y Uy, 48, negosiante ken residente iti 63 Road 2, Corner Road 7, Project 6, Quezon City, ti bangkay nga isu ti ulitegna ni Antonio Uy y Lim, 69, naasawaan, negosiante ken residente iti 338 Road 1, Corner Road 4, Brgy Bagong Pagasa, Quezon City.

Segun iti polis-Suyo, ni mismo a Manzolin ti nangasikaso iti pannakaited ti death certificate ken nangasikaso kadagiti kasapulan a dokumento para iti pannakaibiahe ti biktima.

Nasarakan ti bangkay ni Uy a nagsagrap kadagiti sugat iti ulo ken nadumaduma a paset ti bagina sadiay Man-atong, Suyo.

Di pay ammo ti nangisayangkat iti pammapatay.#