Lalaki a bimmagsol, nakasuan iti frustrated murder

SINAIT, Ilocos Sur – Nakasuan iti frustrated murder ti maysa a barbero gapu iti panangbagsolna iti kalugaranna maigapu iti panagsubangda bayat ti panagiinomda idi rabii ti Hunio 25.

Impakaammo ti municipal police station ditoy a naipilan ti kaso a frustrated murder maikontra ken ni Reynold Challeg y Cawil, 31, naasawaan, barbero, ken residente iti Barangay 7, Bagumbayan, Paete, Laguna ken agbakbakasion iti Barangay Katipunan ditoy, gapu iti panangbagsolna idi agarup alas 9:30 ti rabii ti Hunio 25 ken ni Anthony Ines y Villegas, 44, naasawaan ken residente met laeng iti nadakamat a barangay.

Maipalagip a naggiinom ti suspek ken biktima ken sumagmamano a kalugaranda iti sanguanan ti balay ti ama ti suspek idi adda saan a panagkinnaawatan dagiti dua.

Mapapati a dinarup ti suspek ti biktima ket naggubalda a nagtungpal ti panangbagsol ti immuna iti naudi iti sumagmamano a daras a nakasugatan ti nadumaduma a paset ti bagi daytoy.

Naitaray ni Ines iti Corpuz Clinic and Hospital iti Sinait idinto a tiniliw dagiti nagresponde a polis ni Challeg ket naikustodia iti police station.

Saan a narekobre ti armas a naaramat iti pammagsol.#