Lalaki a nagprobokar, kinabil dagiti kalugaranna

LIDLIDDA, Ilocos Sur –  Malaksid ti pannakakabilna a puon ti nakayospitalanna, sumango pay daytoy a lalaki iti kaso gapu iti panagikutna iti paltog.

Nasalpakan iti kaso nga illegal possession of firearm and ammunitions ni Teddy Antolin, 44, ken residente iti San Vicente ditoy nga ili.

Nakumpiska iti ikut ni Antolin ti maysa a gauge 12 shotgun nga addaan iti 10 a bala a mapapati a pinagkaritkaritna bayat ti panagprobokarna iti barangayda.

Segun iti report, gapu iti panagkaritkaritna, kinamat dagiti lumugar ni Antolin, dinisarmada, sada kinabil a puon ti nagsagrapan daytoy iti dunor iti ulona.

Impaima dagiti lumugar ti paltog ti biktima kadagiti nagresponde a polis sada impan iti ospital tapno maagasan dagiti sugatna.#