Lalaki a nagsagrap 17 a bagsol, nakalasat

VIGAN CITY – Nagasat daytoy a biktima ta saan a patadem no di ket tulbek laeng ti motorsiklo ti naibagsol kenkuana a nagsagrapanna iti sangapulo ket pito a dunor iti nadumaduma a paset ti bagina, nangruna iti likudanna.

Naideklara ni Carlo Baron Marc Angelo Caoile, 23, baro, ken residente iti Barangay Salindeg, ditoy siudad, a nalasatnan ti peggad maigapu kadagiti sinagrapna a bagsol a nagramut iti panagririda ken ni Leonardo Dagdag, Jr., 22, baro, ken residente iti Barangay Zone 2, Bantay, Ilocos Sur bayat ti panaggiinomda iti Solo Contento Resto Bar iti Gen. Luna Street, Barangay I ditoy siudad idi agarup alas una ti parbangon ti Abril 5.

Segun iti report, bayat ti panaggiinom ti biktima ken kaduana iti maysa a lamisaan ken ti suspek ken kaduana iti sabali a lamisaan, adda dida nagkinnaawatan a puon ti panaggubalda.

Mapapati nga inruar ti suspek ti tulbek ti motorsiklona ket daytoy ti imbagbagsolna iti biktima.

Naitaray ti biktima iti Lahoz Clinic and Hospital a nakatamingan dagiti sugatna idinto a tiniliw dagiti nagresponde a polis ti suspek.#