Lalaki a naikustodia iti polis, napaltoganna ti bagina?

SANTA, Ilocos Sur – Naibilin a marestriktaran ti gunay ti maysa a polis ken mapakatan iti paraffin test ti lalaki a natay iti uneg ti seldana babaen ti paltog idi rabii ti Hunio 12.

Napakatan iti restriction order ni PO3 Charlie Cabunoc gapu iti mapapati nga aksidente a pannakapaltog ni Jerry Dameg y Ramos, 30, baro, ken residente iti Barangay Magsaysay District, ditoy nga ili.

Ni Cabunoc ti guardia iti pagbaludan iti daydi a rabii a mapapati a pannakapaltog ni Dameg iti bagina a nagresulta iti pannakatayna.

Naikustodia ni Dameg iti police station sakbay a maiyalis iti Mandaluyong Mental Hospital para iti rehabilitasionna.

Segun iti report, nangiwayat ni Cabunoc iti inspeksion iti detention cell ken nagpatangda iti apagbiit iti detainee.

Ngem idi pumanawen ni Cabunoc, mapapati a kellaat a ginammatan ni Dameg ti paltog ti polis a nakasuksok iti holster sa nagtaray iti naun-uneg a paset ti pagbaludan.

Kellaat a nagkanalbuong ket nakita laengen ni Cabunoc ni Dameg a nakaparintumeng nga agik-ikkis.

Nagpatulong ni Cabunoc iti sabali a polis ket intarayda ni Dameg iti Gabriela Silang General Hospital ngem indeklara ni Dr. Porfirio Tugas a dead on arrival.

Kanaig daytoy, nakiddaw ti pannakaautopsia ti bangkay ni Dameg ken ti pannakaipakat ti paraffin test iti biktima agraman ni Cabunoc tapno maammuan no positiboda iti pulbora.

Manamnama a maammuan ti resulta dagitoy iti mabiit.#