Lalaki, aksidente a napaltogan

CERVANTES, Ilocos Sur – Aksidente a napaltogan ti maysa a lalaki ti kaarrubana bayat ti pannakiringgorna idi rabii ti Enero 21 iti Sitio Likdasan, Barangay San Juan ditoy nga ili.

Napaltogan ni Arnold Villanueva y Gaburno, 31, naasawaan, residente iti nadakamat a lugar ket naitaray iti Bessang Pass Memorial Hospital sa naiyalis iti San Fernando City.

Segun iti inisial nga inbestigasion, nakiringgor iti kaarrubana ni Jonathan Gacusan y Achala, 32, naasawaan, tricycle driver, residente met laeng iti nasao a lugar ket inasutna ti paltogna ngem aksidente a nakalbitna ti gatilio ket napuntaan ti kannigid a gurong ni  Villanueva nga adda iti bahay kubo iti asideg.

Boluntario a simmuko ni Gacusan kadagiti nagresponde a polis.#