Lalaki, binagsol asawa ti intsek-inna iti otel

SAN VICENTE, Ilocos Sur – Dika agay-ayam iti apuy no dimo kayat ti mauram a pakairamramanan ti sibubukel a pamiliam, leksion daytoy ti maysa a babai kalpasan a pinatay ti lakayna ti lalaki a mapapati a karelasionna iti uneg ti maysa a pagdagusan sadiay Barangay Bayubay, ditoy nga ili idi rabii ti Disiembre 10.

Nainaganan ti nabagbagsol a ni Roderick Tabisula y Polca, baro, kolektor/teknisian ti Read East Electric Bikes, Bantay Branch, ken residente iti Barangay Camestizoan, Sto. Domingo, Ilocos Sur idinto a nabigbig met ti bimmagsol kenkuana a ni Rogie Curioso y Fernandez, 33, naasawaan, drayber, ken residente iti Barangay Pantay Daya, Vigan City.

Idi agarup 9:25 iti dayta met laeng a rabii, nakaawat ti polis iti tawag iti telepono manipud iti receptionist a nangipakaammo nga adda riribuk iti uneg ti Room No. 105.

Dagus a nagresponde dagiti polis nga indauluan ni Police Inspector Ruben Garcia ket idi makadanonda iti inn, nakitada iti uneg ti kuarto ni Tabisula nga awanen ti biagna a nadigos iti bukodna a dara.

Iti panagimbestiga dagiti polis, idi agarup alas 8:00 ti sardam ti nadakamat a petsa, nagtsek-in  ni Tabisula ken ti asawa ti suspek a ni Leticia Curioso y Garcia, agraman ti sangapulo ti tawenna nga anakna iti Metro Vigan Inn a masarakan ditoy nga ili.

Kalpasan ti nasurok a maysa nga oras, nakita ti maysa a di nainaganan a room boy ni Curioso a rimmuar iti nadakamat a kuarto a nakaiggem iti imuko.

Mapapati nga imbalikas ti suspek ti sumaganad: “Putotko daydiay.”

Nagsagrap ti biktima iti pito a bagsol a puon ti nakatayanna a dagus.

Nakasarak met dagiti inbestigador manipud iti Provincial Crime Laboratory nga indauluan ni Supt. Jose Wacangan iti nakapasamakan ti krimen iti dua a sag-P500.00, 3 a sag-P100.00, 3 a sag-P20.00 nga agdagup iti P1,360.00, selpon a Nokia ken Samsung, driver’s license ti biktima, jungle bag a naglaon kadagiti school paraphernalia, kasta met ti  Electric bike a mapapati a nagluganan ti biktima ken dagiti agina.

Boluntario a simmuko ti suspek iti police station ditoy, kuyogna ti imuko nga agatiddog iti sumurok kumurang walo a pulgada agraman iti pagiggaman idinto a naipan ti bangkay ti biktima iti Holy Angel Funeral Homes, Vigan City para iti pannakaautopsia ken pannakaimassayagna.

Iti kaudian a damag, naiyendorson ti kaso a homicide maikontra ken ni Curioso iti opisina ti provincial prosecutor iti Vigan City a nai-docket iti NPS No. I-03-INQ-13l-00171 babaen ti maysa nga inquest proceedings a napetsaan Disiembre 11, 2013.#