Lalaki, binagsol ti kabsatna, natay

STO. DOMINGO, Ilocos Sur –  Pimmusay iti ospital ti maysa a lalaki a binagsol ti kabsatna idi Marso 7.

Natay ni Jose Tabin y Taay, 53, naasawaan, residente iti Barangay Vacunero ditoy nga ili bayat ti pannakatamingna iti Tolentino Clinic and Hospital idinto a tiniliw dagiti nagresponde a polis ti bimmagsol kenkuana a kabsatna a nainaganan Faustino Tabin y Taay, 58, naasawaan, agnaed met laeng iti nadakamat a barangay.

Iti panagimbestiga dagiti polis, naammuan a bayat ti panagginom dagiti agkabsat, naparnuay ti dida panagkinnaawatan ket binagsol iti namindua ni Faustino ti tian ni Jose.

Narekobre dagiti polis ti imuko a naaramat iti pammagsol.#