Lalaki, binagsol ti kinaririna, natay

SUYO, Ilocos Sur – Natay ti maysa a lalaki gapu iti panangbagsol kenkuana ti kinainomna sadiay Barangay Baringcucurong, ditoy nga ili idi Hunio 4.

Nabigbig ti biktima a ni Jose Hernando Castro, 48, naasawaan, ken residente iti Barangay Garitan, Tagudin, Ilocos Sur, ken ti nangbagsol kenkuana a ni Robert Barbon, Sr., foreman, tubo ti Peñarubia, Abra, ngem temporario nga agnaed iti Barangay Nagtupacan, Sta. Maria, Ilocos Sur.

Mapapati a nagramut ti pammagkong iti panagriri dagiti dua. Saan a nadakamat iti report no ania ti nagsusikan dagiti dua.

Intaray dagiti nagresponde a polis ni Castro iti rural health center ditoy ngem naideklara a dead on arrival.

Naglibas ti suspek kalpasan ti pammagkong ket iti pannakaisurat daytoy, di pay nasapulan dagiti polis.

Nakarekobre dagiti polis iti kitchen knife iti nakapasamakan ti krimen.#