Police Report: Lalaki, binagsolna ti bukod na a bagi gapu iti imon | Tawid News Magazine - Weekly Ilocos News 📰

Lalaki, binagsolna ti bukod na a bagi gapu iti imon

SINAIT, Ilocos Sur — Imon ti mapapati a rason iti panangbagsol ti maysa a nataengan a lalaki iti bukodna a bagi idi bigat ti Mayo 22, daytoy a tawen.

Segun iti inbestigasion ti Sinait MPS, naammuan a binagsol ni John Hen Vir Laino y Gomez, 34, naasawaan, laborer ken residente iti Barangay Paratong, Sinait, Ilocos Sur ti rusokna babaen iti maysa a kitchen knife gapu iti nalabes nga imon iti nakitana a ladawan nga in-post iti social media ti asawana a maysa nga OFW sadiay Singapore.

Kalpasan a binagsolna ti bagina, nagpaarayat met laeng a dagus ni Laino kadagiti kabagianna a dagus met a nangitaray kenkuana sadiay Corpuz Clinic and Hospital iti Sinait. Naiyakar ni Laino iti Mariano Marcos Memorial Hospital and Medical Center, Batac City, Ilocos Norte para iti naan-anay a pannaka-agas ti dunorna.