Lalaki, dua beses natiliwan a nagaramid iti dakes

VIGAN CITY – Sumagmamano nga oras kalpasan a natiliw ni Michael Pipo y Evangelista, 37, residente iti Zone 1, Bantay, Ilocos Sur iti tresspassing sadiay Barangay 4, ditoy siudad, ginandatna pay ti mangtakaw iti motorsiklo idi agsapa ti Oktubre 13.

Segun ken ni Melvin Altura y Javier, 47, akinkukua iti MF Planet Gaming and Internet Cafe, ken residente iti Barangay 4, Vigan City, natiliwanna ni Pipo iti akto a mangitalaw iti motorsiklona a Honda Beat a nakaparking iti sanguanan ti shop idi agarup 5:30 ti agsapa ti nadakamat a petsa.

Segun ken ni Altura, idi masukalan, inibbatan ni Pipo ti lugan sa naglibas.

Idi agarup 12:30 ti malem iti dayta a petsa, naammuan ni Altura a kalpasan ti pannakapaay ni Pipo a mangtakaw iti motorsiklona, simrek ti suspek iti inaladan ni Ruben Abalos y Avila, 45, ken residente met laeng iti Barangay 4, idi agarup 6:20 iti dayta met la nga agsapa ngem nasiputan ni Albalos ket nagpaarayat kadagiti kabagian ken kaarrubada.

Naipiskot dagiti lumugar ni Pipo ket impaimada iti polis.

Idi naammuan ni Altura ti kaadda ni Pipo iti police station, inreportna met ti pananggandat ti suspek a mangtakaw iti motorsiklona.

Suspetsa dagiti polis a simrek ni Pipo iti inaladan ni Albalos tapno agtakaw.#