Lalaki, ginudas 2 nakalugan iti motorsiklo

VIGAN CITY – Maysa a mannalon ti ginudas dagiti dua nga armado a tattao idi agarup alas otso ti rabii ti Mayo 14 iti Sitio Nalasin, Barangay Camangaan, ditoy siudad.

Saanen a naidanon iti Gabriela Silang General Hospital iti Tamag, ditoy ti biag ni Benjamin Petate, 50, naasawaan, agindeg iti nasao a lugar gapu iti sugatna iti nadumaduma a paset ti bagina.

Segun iti inbestigasion, kadisdissaag ti biktima iti traysikel a naglugananna iti asideg ti balay ti anakna idi pinaltopaltogan dagiti dua suspetsa a naglugan iti motorsiklo.

Mapapati a nasaksian ti anak a babai ti biktima ti pannakapaltogna ngem saan daytoy a nailasin dagiti suspetsa gapu ta nasipnget ti naggiananda.

Nakarekobre dagiti inbestigador kadagiti basyo ti bala manipud iti cal. 45 iti nakapasamakan ti krimen .

Di pay ammo ti motibo ti pammapatay.#