Lalaki, ginudas armado a lallaki a riding in tandem

VIGAN CITY – Kiniddaw ti kapolisan ditoy iti crime laboratory office ti pannakaiwayat ti computerized composite facial illustration dagiti suspek para iti nadardaras a pannakatiliwda.

Kanaig daytoy, inalaan metten dagiti inbestigador ni Ceynorh Doria Villaspir, 24, ken residente iti Barangay IX, Vigan City, Ilocos Sur iti sworn statement pakaseknan iti pannakapapatay ti kalib-inna a ni Christopher Cesar Cabanas aka “Boy”, 34, naasawaan, residente iti Barangay Abuor, Narvacan, Ilocos Sur ngem agnanaed iti Barangay Puro, Magsingal, Ilocos Sur ngem saan pay a nabigbig dagiti suspek.

Kabayatanna, napakatan metten ni Cabanas iti autopsia babaen ken ni Police Supt. Nerino Daciego, regional chieg ti Crime Laboratory Office, Police Regional Office, San Fernando City, La Union tapno maammuan dagiti sugatna a nakaipuon iti ipapatayna.

Saanen a naidanon iti ospital ti biag ni Cabanas kalpasan a pinaltogan dagiti armado a lalaki a nagkalubbon iti motorsiklo sadiay Barangay IX ditoy siudad idi rabii ti Nobiembre 17.

Dead on arrival ni Cabanas iti Gabriela Silang General Hospital a nakaitarayanna gapu kadagiti grabe a sugatna iti nadumaduma a paset ti bagina ken iti ulona.

Saan a nabigbig dagiti suspek a naglugan iti Honda XRM motorcycle a naglibas kalpasan ti pammaltog.

Segun iti report manipud iti polis ditoy, idi agarup 10:30 ti rabii ti Nobiembre 17, bayat a nakasardeng ti Honda XRM a minaneho ti biktima iti akinlaud nga abaga ti kalsada iti Rivero Street ti nadakamat a barangay, kaluganna ti kalib-inna, inasitgan dagiti suspek a nakalugan iti nangisit a Honda XRM sada pinaltogan iti sumagmamano a beses ti biktima.

Nangiwayat dagiti nagresponde a polis iti hot pursuit operation ken napakaammuan dagiti kabangibang a police stations para iti pannakatiliw dagiti suspek ngem negatibo ti resultana.

Bayat ti panagimbestigada babaen ti tulong ti KIMAT clustered police stations, nakarekobre ti SOCO team iti cal. 45 ken cal. 5.56 a mapapati a naaramat iti krimen kas maibasar kadagiti nasarakan a kapsula iti crime scene.

Iti pannakaisurat daytoy, di pay ammo ti motibo ti pammapatay. (Karaman ti report ni Edison Raboy)