STA. MARIA, Ilocos Sur -Gapu iti panangkomprontana kadagiti suspek, namalmalo ti maysa a residente iti Sitio Bagong Bario, Poblacion Sur ditoy nga ili idi rabii ti Abril 16.
Nagsagrap iti dunor iti ulo a puon ti nakayospitalanna iti Reyes Clinic and Hospital ni Robert Antonio y Espinosa, 20, naasawaan, gapu iti panangmalo kenkuana da Amado Ramirez, naasawaan, ken Daniel Tomoplat, 38, naasawaan, agpada a tanod ken residente iti nadakamat a sitio.
Naammuan iti inbestigasion a madama ti panaginom dagiti dua a tanod idi napan ni Antonio iti balay ni Ramirez sana kinompronta ida.
Mapapati a saan a nagustuan dagiti suspek ti inaramid ti biktima ket minaloda daytoy iti nadumaduma a paset ti bagina ken iti ulona a nakadunoranna.#
