Lalaki, naapput a nagtakaw

BANTAY, Ilocos Sur – Naapput ti maysa a lalaki sakbay a makalibas kalpasan a nagtakaw iti kuarto a nagtsek-inan ti maysa a sales representative iti maysa nga otel sadiay Barangay Balaleng Laudenia ditoy nga ili idi rabii ti Hulio 10.

Inaresto dagiti nagresponde a polis ni Elmer Santos y Pipo, 25, baro, ken residente iti Zone 1, Bantay, Ilocos Sur kalpasan a nasukalan iti back pack daytoy ti body bag a tinakawna iti kuarto ni Eloisa Madayag y Santos, 34, naasawaan, ahente ti Jocel Group of Companies, ken residente iti Brgy. Licaong, Muñoz, Nueva Ecija ken maysa nga Omni emergency light a kukua ti Farm View Hotel.

Sakbayna, idi agarup 3:00 ti malem ti dayta a petsa, nagtsek-in ti suspek iti No. 108 para iti panaggianna iti agpatnag.

Nagtsek-in met iti Room 106 ni Madayag, kaduana ti maysa a Cesar Flores y Allarilla, 35, naasawaan, ken residente iti Barangay Abar First, San Jose City, Nueva Ecija idi agarup 10:30 iti dayta a rabii.

Kalpasan ti panagtsek-inda, rimmuar ni Madayag ken ni Flores tapno mapanda alaen ti tsinelasda iti kotseda ket pinanawanda ti bag iti uneg ti kuarto.

Idi agsubli ti drayber iti kuarto, awanen ti bag ni Madayag ket iti panagsaludsodna iti room boy, kinuna daytoy a nakitana ni Pipo nga immuneg iti siled.

Rinikisa ti drayber ken ti roomboy ni Pipo a pumanaw koman ket nasukalanda iti back pack daytoy ti mapukpukaw a bag ken ti emergency light.

Naipan ti suspek iti police station para iti umisu a disposision.#