Lalaki, naapput iti buy bust operation

STA. MARIA, ILOCOS SUR –  Maysa a buy-bust operation iti daytoy nga ili ti nagbunga iti pannakatiliw ti maysa a lalaki sadiay Barangay Laslasong Sur ditoy nga ili idi aldaw ti Agosto 13.

Iti insayangkat ti nagtipon nga elemento ti PDEA Ilocos Sur Sector Special Enforcement Team nga impanguluan ni Intelligence Officer III Darnel Bacate y Libao ken dagiti polis iti Sta. Maria iti panangidaulo ni SP03 Joel Peña Dasargo iti babaen ti superbision  ni PSInsp. Regino M. Genoso Jr. iti nadakamat nga aldaw, nakasamsamda ken ni Raffy Foronda y Siddayao, edad 28, separado, awanan trabaho ken agnaed iti Brgy. Poblacion, Sta. Maria, Ilocos Sur, iti dua a plastic sachet (small heat sealed ken elongated heat sealed) nga agdagsen iti 0.2 a gramo a nagkarga iti  mapapati a shabu a mapattapatta nga agbalor iti P1,500.00 iti merkado,  P1,000.00 a naaramat iti buy-bust operation, maysa a nangisit a RUSI a motorsiklo nga addaan iti sidecar, ken maysa a selpon.

Naipan ti suspek ken dagiti nakumpiska nga items iti ikutna  ken ti motorsiklo iti police station ti Sta. Maria para iti dokumentasion sada naipan iti  PDEA Camp Diego Silang, San Fernando City, La Union.

Iti pannakaisurat daytoy, maisagsagana ti mayuli a darum kontra iti suspek gapu iti panaglabsingna iti RA 9165 (Comrehensive Dangerous Drug Act).#