Lalaki, naaresto gapu iti panagikut iti armas

CANDON CITY – Maysa a lalaki ti inaresto dagiti polis idi Hunio 24 bayat ti panagtsekpointda iti Barangay Darapidap ditoy gapu iti illegal a panagikutna iti paltog.

Nabigbig ti lalaki a ni Franklyn Banua y Ricardo, 24, naasawaan, natibo ti Barangay Sibsibbu, San Emilio, Ilocos Sur ngem agdama nga agnaed iti Barangay Darapidap ditoy siudad.

Segun iti report, bayat ti panagtsekpoint dagiti barangay officials ken BPATS ken tanod iti junction ti Barangay Darapidap iti sanguanan ti Candon Beach Resort,  pinarada ni Banua a nakasakay iti motorsiklo para iti routine check-up ken nakasukalanda iti ikut daytoy ti cal 38 revolver (paltik) a Smith and Wesson ngem awanan iti numero ken nagkarga iti live a bala ken maysa a kapsula iti cylinderna.

Kinumpiska dagiti barangay officials ken tanod ti nasao a paltog sada impaima ti suspek agraman ti paltogna kadagiti nagresponde a polis.

Iti pannakaisurat daytoy, naipaiman iti opisina ti city prosecutor ti complaint a panaglabsing iti RA 8294 maikontra ken ni Banua.

Inwayat ti kapolisan ditoy iti panangidaulo ni Police Supt. Marlo Castillo, hepe ti polis, ti naing-inget ken agresibo a kampania maikontra iti agraira a paltog iti siudad ken Oplan Paglalansag babaen ti pannakitinnulong dagiti amin a barangay iti siudad.#