Lalaki, nabagsol iti daduan

STO. DOMINGO, Ilocos Sur – Riri iti pusta ti ramut ti nakabagsolan ti maysa a lalaki bayat ti pannakidadona iti natayan sadiay Barangay Poblacion ditoy nga ili idi parbangon ti Agosto 29.

Immuna a naitaray iti Tolentino Clinic and Hospital sa naiyalis iti Metro Vigan Cooperative Hospital ni Jay Quilas y Acebedo, 37, ken residente iti Barangay Nalasin gapu iti sugatna iti nadumaduma a paset ti bagina kalpasan a binagbagsol ni Julius Tobias y Quitevis, 32, baro, ken residente iti Barangay Poblacion.

Nagriri dagiti dua gapu iti pusta bayat ti pannakidadoda iti natayan sadiay Barangay Poblacion ket mapapati a dinisnog ni Quilas ni Tobias a bimmalesan ti suspek babaen ti panagbagsolna iti namin-adu a daras ti biktima.

Naglibas ti suspek kalpasan ti pammagsol.#