Footer

Lalaki, nabato ti ulona, nayospital

STA. CRUZ, Ilocos Sur – Tallo nga ospital ti nakaipanan ti maysa a lalaki gapu iti pannakabatona sadiay Barangay Pilar ditoy nga ili idi rabii ti Oktubre 10.

Immuna a naitaray iti Sta. Lucia District Hospital ni Romy Bermudez y Cabatu, 30, naasawaan, sa naipan iti Candon City Hospital sa naiyalis iti Ilocos Training and Regional Medical Center, San Fernando City, La Union gapu iti grabe a sugatna iti ulona.

Inaresto met dagiti nagresponde a polis ni Ronaldo Cabradilla y Gazmen, 40, naasawaan, residente iti Barangay Pilar.

Iti inisial a panagimbestiga dagiti polis, naggiinom ti biktima, suspek ken sumagmamano a kakaduada iti balay ni Chavit Cabatu ket adda napasamak a nabara nga argumento iti nagbaetan da Ruperto Cabatu, kabagian ti biktima, ken ti suspek ngem inanawa ida dagiti kakaduada.

Kalpasan ti insidente, naggawid da Cabradilla ken Bermudez  a nakalugan iti bukodda a motorsiklo ngem mapapati a nagsarak dagiti dua iti barangay road ket binato ti suspek ni Bermudez a nakapuntaan ti ulo daytoy.#