Lalaki, nadungpar iti motorsiklo, natay

STA. CRUZ, Ilocos Sur –  Saanen a nakaabut iti selebrasion ti Paskua ti maysa a lalaki agsipud ta natayen idi maidanon iti ospital kalpasan a nadungpar iti motorsiklo sadiay Barangay Camangaan idi sardam ti Disiembre 24.

Naideklara nga awanen ti biag ni Crisencio Marquez y Come, 52, naasawaan, ken residente iti Barangay Camangaan, ditoy nga ili, idi maidanon iti Sta. Lucia District Hospital kalpasan a dinungpar ti motorsiklo a minaneho ni Macekino Bernal y Ariatico, 25, baro, CAFGU member, ken residente iti Barangay Padaoil, ditoy met laeng nga ili.

Naammuan iti police blotter a mapan koma makiselebrar iti Paskua ni Bernal, kaduana da Nikki Gandeza y Cabranilla, 19, single, ken Laarni Manzano y Cabranilla, 17, single, high school student ken agpada a residente iti Brgy. Pilar, Sta Cruz, Ilocos Sur idi aksidente a nadungparda ti biktima a mapapati a kellaat a bimmallasiw iti kalsada a puon ti nagsagrapanna kadagiti serioso a sugat iti ulona.

Boluntario a simmuko ni Bernal iti police station ti Sta. Lucia.#