Lalaki, nadungpar ti lugan iti tengnga ti kalsada

SINAIT, Ilocos Sur – Maysa a lalaki ti dinungpar ti motorsiklo bayat ti panagnana iti tengnga ti kalsada idi parbangon ti Marso 27.

Iti pannakaisurat daytoy, saan pay a nabigbig ti nadungpar nga immuna a naitaray iti Sinait District Hospital sa naiyalis iti Gabriela Silang General Hospital iti Vigan City.

Segun iti inbestigasion, agdaldaliasat iti national highway a sakup ti Barangay Magsaysay ni Edwin Rivera y Ibe, 37, naasawaan, mannalon, ken residente iti Barangay Zapat, ditoy nga ili, ken ti kaluganna iti motorsiklo a ni Camille Marquez y Corpin, 22, awanan asawa, ken residente iti Barangay Magsaysay, Sinait ket mapapati a naladaw a nakita ni Rivera ti biktima a magmagna iti tengnga ti kalsada a puon ti nakadungparanna iti daytoy.

Nagsagrap ni Rivera ken ti back riderna iti garumiad iti nagduduma a paset ti bagida idinto a natukkol ti makannigid a saka ken nadundunor dagiti ima ti biktima.

Di nailanad iti blotter no apay a magmagna iti tengnga ti kalsada ti lalaki iti dayta nga oras.#