Lalaki, nagandat ti biagna

NARVACAN, Ilocos Sur – Ginandat ti maysa a mannalon a gudasen ti kalugaranna bayat ti pannaturog daytoy iti maysa a kalapaw sadiay Barangay Banglayan ditoy nga ili idi rabii ti Oktubre 3.

Naitaray iti Central Ilocos Sur District Hospital ni Jim Saldua y Bitle, 30, baro, ken residente iti nadakamat a barangay gapu iti sinagrapna a sugat iti makannigid a gurong ken makannawan a sakana.

Naammuan iti inbestigasion a matmaturog ni Saldua iti kalapaw a kukua ni Florante Gines idi pinaltogan ni Delfin Cabaña y Cera, 49, naasawaan, mannalon ken lumugar met laeng iti nasao a barangay.

Nakarekobre dagiti nagresponde a polis iti nakapasamakan ti pammaltog kadagiti 17 a kapsula a nagtaud iti cal M16 rifle.

Inaresto dagiti polis ti suspek iti pagtaenganna.

Nakasuan ni Cabaña iti frustrated murder ket nairekomenda nga agpiansa iti P200,000 para iti temporario a pannakawayawayana.#