Lalaki, nagbekkel; problema ti pamilia ti gapuna

STO. DOMINGO, Ilocos Sur – Nasarakan a maysan a bangkay ti maysa a lalaki a mapapati a nagbitin iti kuartona idi rabii ti Nobiembre 1.

Awanen ti biag ni Elvero Velenciano y Zafe, 48, ken residente iti Barangay Padu Chico, idi masarakan a nakabitin iti uneg ti kuartona idi agarup 11:10 ti aldaw ti Nobiembre 2.

Nakasarak pay dagiti immarayat iti suicide note a naiparabaw iti katre.

Naammuan iti inbestigasion nga iti karabian ti Nobiembre 1, nakaro ti bartek ti biktima.

Kabigatanna, nagpatulong ti katugangan ti biktima idi makitana a nakarikep pay la ti balay daytoy ken awan ti nakitana pay a rimmuar ket nakitada laengen a nakabitin ti biktima iti ngatuen ti katrena.

Mapapati a problema ti pamilia ti gapu a nagbekkel ti biktima.#