Lalaki a nagikut iti droga, tiniliw dagiti polis

TAGUDIN, Ilocos Sur – Inaresto dagiti polis ti maysa a lalaki a nasukalan nga agikut iti marihuana iti uneg ti maysa a videoke bar sadiay Barangay Dardarat ditoy nga ili idi Disiembre 10.

Nabigbig ti suspek a ni Jun-Jun Joven y Padillon,  27, naasawaan, ken residente iti Barangay Pacac, ditoy met laeng nga ili.

Bayat ti panangipakat dagiti polis iti Oplan Sita iti Araceli’s Restaurant and Videoke Bar, nasiputanda ni Joven a kellaat a timmakder sa immadayo isu a dagus a kinapkapanda a nagresulta iti pannakatakuatda iti maysa a paper bag iti siket ti suspek a naglaon kadagiti napagango a bulong ti marihuana nga agdagsen iti sumurok kumurang 125 grams.

Naimatangan dagiti barangay tanod ti pannakasukal dagiti maiparparit a droga iti ikut ni Joven.

Naipan ti suspek agraman ti nakumpiska kenkuana iti police station para iti dokumentasion ken umisu a disposision.#