Footer

Lalaki, nagpaputok idi dida lakuan iti arak

LAOAG, Ilocos Norte – Maysa a lalaki ti agkakaso a nagramut iti saanna a pannakagatang iti arak idi rabii ti Disiembre 29 iti Barangay Bariquir, Nueva Era, ditoy a probinsia.

Nakasuan ni Antonino Baltazar, Jr., residente iti Barangay Bariquir, Neva Era, Ilocos Norte iti provincial prosecutor’s office iti Laoag City mainaig iti panagpaputokna iti paltog kas reaksionna idi saan a malakuan iti arak.

Segun iti inbestigasion dagiti polis, saan a kayat a lakuan ni Helen Duyao ni Baltazar gapu ta nakarikepen ken rabiin ket nakapungtot ti suspek ket nagpaputok iti namitlo a daras.

Mapapati a kadua ti suspek ti maysa a barangay kagawad a napan gimmatang iti arak ket saan a nalapdan daytoy ti panagpaputok ti suspek.#