Footer

Lalaki, nagpaturong iti peke a paltog

TAGUDIN, Ilocos Sur – Maysa a panagprobokar babaen ti peke a paltog ti impulong ni Arvin Dauz iti Tagudin MPS idi 6:30 ti rabii, Nobiembre 25, 2018.

Iti panagimbestiga dagiti kameng ti nasao a police station iti nakapasamakan ti insidente, naamuan a maysa nga agnagan Alfie Lapeña y Avecilla, 25, awanan asawa, construction worker, ken residente ti Brgy. Garitan, daytoy nga ili, ti pinaturongan iti paltog ti maysa agnagan Christian Lebantino y Vedania, residente ti Brgy. Tallaoen, daytoy met laeng nga ili.

Iti pakauna nga inbestigasion, madama nga aggiinum da Alfie Lapena ken gagayyemna idi lumabas ti suspek, ni Christian Lebantino y Vedania, ket dinanogna ti pispis ni Lapena nga awan gapuna sa nangasot iti mapapati a paltog, manipud iti siketna sana impaturong ken ni Lapena.

Nagtaray a naggawid ti napakigtotan a biktima ket nagpulong iti inana.

Dagus met a natiliw dagiti nagresponde a polis ti suspek ket nabirokanda ti nasao nga armas iti bubong ti sari-sari store a nakapasamakan ti insidente. Idi sukimaten dagiti polis ti nasao a paltog, ditoyda a naammuan a maysa laeng a replica daytoy nga addaan marka a U.S. 9mm M9-P Beretta Gun Lighter.

Naipan ti biktima ken ti suspek iti Ilocos Sur District Hospital, Brgy. Bio Tagudin, Ilocos Sur para iti medical examination, santo naipan iti presinto ti suspek para iti umisu a disposision. (Tawid News Team)