Lalaki, nagudas iti stray bullet

SINAIT, Ilocos Sur – Natay iti ospital ti maysa a lalaki a napuntaan iti stray bullet iti pannakapaltog ti maysa nga aglaklako kalpasan ti programa ti panagturpos a naangay iti Sinait East Central School ditoy.

Pimmusay ni Alden Ilagan, 24, baro, residente iti Barangay Pacis ditoy nga ili bayat ti pannakaagasna iti Corpuz Clinic and Hospital. Naitaray met laeng ditoy nga ospital ni Marlita Linda Quitoriano, 52, naasawaan, aglaklako, residente iti Barangay Namnama ditoy met laeng nga ili sa naiyalis iti Metro Vigan Cooperative Hospital para iti pannakaagas dagiti sugatna iti luppona.

Segun iti inbestigasion dagiti polis, kalkalpas ti programa ti panagturpos iti nasao a pagadalan ket ipakpakni ni Quitoriano dagiti lakona tapno maikargada iti lugan idi immasideg ti di pay nabigbig a lalaki sana pinaputokan ti biktima.

Nakailad ni Ilagan iti service vehicle idi mapuntaan ti ulona iti naiyaw-awan a bala.

Naglibas ti suspetsa kalpasan ti pammaltog.#