Lalaki, nagudas iti uneg ti tiendaan

SINAIT, Ilocos Sur – Nagudas ti maysa a lalaki iti uneg ti tiendaan bayat ti panangurayna iti misisna nga adda iti beauty parlor sadiay Barangay Macabiag ditoy nga ili idi apagsipnget ti Marso 14.

Saanen a naidanon a sibibiag ti biktima a ni Finlan Yoro y Katindoy, 35, naasawaan, ken residente iti Barangay Katipunan iti ospital a nakaitarayanna gapu iti sugatna iti ulo, tengnged ken abagana.

Limtuad iti inbestigasion nga idi agarup alas 6:20 ti malem ti nadakamat a petsa, agtugtugaw ni Yoro iti sanguanan ti puesto ti agnagan Joey ken Arlyn iti uneg ti tiendaan ket ur-urayenna ti asawana nga adda iti beauty parlor idi inasitgan ti maysa a lalaki a nakaaruat iti nangisit a hooded jacket sana pinaltogan ti biktima.

Naglibas a dagus ti di nabigbig a suspek kalpasan ti pammaltog.

Naitaray ni Yoro iti Corpuz Clinic and Hospital ngem indeklara ti doktor a nangtaming kenkuana a dead on arrival.

Di ammo ti naaramat a paltog gapu iti kaawan ti narekobre a kapsula wenno buli iti nakapasamakan ti krimen.

Saan pay met nga ammo ti motibo ti pammaltog.#