Lalaki a nakaarmas, nagikut iti droga, naipiskot dagiti polis

CABUGAO, Ilocos Sur – Agsakit la ketdi ti ulo daytoy a lalaki gapu iti sanguenna a kaskaso ta saan laeng a droga no di pay paltog, granada ken balbala ti nasukainan dagiti polis iti ikutna bayat ti panagpatroliada sadiay Barangay Pug-os ditoy nga ili iDi parbangon ti Agosto 15.

Bayat ti panagpatrolia dagiti polis nga indauluan ni COP Chief Inspector William N. Nerona iti barangay road a sakup ti nadakamat a barangay nga agturong iti national highway, nasilnagan ti silaw ti mobile car a naglugananda ti masabatda a magmagna a lalaki a nakaaruat iti asul a diaket ken adda awitna iti likudna a nangisit a back pack ken nakaiggem iti sabali a bag.

Ngem kellaat a timmaray nga agpalaud ti lalaki, a nabigbig idi agangay a ni Henry Castillo y Castillo, 40, ken residente iti Barangay Pug-os, ket kinamat dagiti polis agsipud ta nakitada nga adda paltog a nakasabbikel iti siketna.

Idi nakamatanda ni Castillo, kinumpiska dagiti polis ti nakasabbikel iti siketna a single shot homemade pistol (one pong) nga addaan iti live ammo.

Sinukimat dagiti polis ti back pack ken bag ni Castillo ket nasukainanda dagiti sumaganad: maysa a hand grenade, 5 bala para cal. 5.56, black holster, blank ammo para cal. 380, jungle bolo nga addaan scabbard, 4 pellets para air gun, 2 selpon a Cherry Mobile ken SAMSUNG, 10 syringes, 23 glass tubes, improvised tube, 7 lighter, 4 improvised tooter a naaramid iti plastic straw, 14 medium empty plastic sachets nga addaan residue a mapapati a shabu, amarilio a plastic case ken maysa a medium heat sealed plastic sachet a nagkarga iti white crystalline substance a mapapati a shabu, maysa a peke a P500.00, 2 a sag-P100.00, P20.00, 3 a P5.00 ken cal. 5.56

Naipan ti suspek agraman dagiti nakumpiska kenkuana iti police station para iti umisu a disposision idinto a naipatulod iti Crime Laboratory Office, Camp Valentin Juan, Ilocos Norte PPO dagiti mapapati a droga ken drug paraphernalia para iti pannakaamirisda.

Kabayatanna, naipalab-og iti iket ti kapolisan ti maysa a tricycle driver iti buy bust operation nga insayangkat ti joint elements ti PDEA ISSET, ISCIDG ken Sta. Maria police station iti rangtay sadiay Barangay Maynganay Norte idi malem ti Agosto 14.
Inaresto dagiti polis ni Rolly Castillo y Mendoza, 39, residente iti Barangay Poblacion kalpasan a nakumpiska iti ikutna ti maysa a transparent heat sealed plastic sachet a naglaon iti mapapati a shabu, maysa a nangisit a Myphone cellphone ken P1,000.00 nga addaan serial no. FX019906 a naaramat a marked money.#