Lalaki, nakasuan panaglabsing iti RA 10591 ken attempted homicide

VIGAN CITY – Naiyendorso a makasuan ti maysa a lalaki gapu iti mapapati a pananggandatna iti biag iti kalugaranna a nagramut iti panagsubangda sadiay Barangay 4 ditoy siudad idi bigat ti Hulio 21.

aiyendorso a mapilaan iti kaso a panaglabsing iti RA 10591 ken attempted homicide iti city prosecutor’s office, Vigan City ni Jerome Cachola Parungao, 35, naasawaan, ken residente iti Barangay Ayusan Norte, Vigan City gapu iti mapapati a panangpaltogna ken ni Rey Allan Alconis y Manlinong, 33, naasawaan, residente met laeng iti Barangay Ayusan Norte.

Mapapati a saan a pimmutok ti paltog idi pinaltogan ni Cachola ni Alconis.

Segun iti inisial a panagimbestiga dagiti nagresponde a polis, nagkita da Cachola ken Alconis iti sango Burgos Memorial School West idi agarup 11:40 ti bigat idi napanda sinukon dagiti annakda nga agbasbasa ditoy a pagadalan.

Saan a nailanad iti blotter no ania ti nakagapu iti panagsubang dagiti dua a nagtungpal iti panangbunot ni Cachola iti paltogna sana pinaltogan ni Alconis ngem mintis.

Mapapati a maysa nga Allan Abalos y Sanidad, 39, residente iti Barangay 4, ti namagtalna kadagiti dua ken nangkumpiska iti paltog a homemade caliber .22 revolver a nagmarka iti U.S.A. ken addaan iti uppat a bala iti cylinderna sana inyawat iti maysa a Frederick Pascual y Paz, 38, tricycle driver ken residente met laeng iti Barangay 3. Ni Pascual ti nangisuko iti paltog kadagiti nagresponde a polis.

Adda itan iti kustodia ti police station ni Cachola agraman ti nakumpiska a paltog para iti dokumentasion ken umisu a disposision.

Kabayatanna, naiyendorso metten iti opisina ti provincial prosecutor ti kaso a panaglabsing iti RA 10591 maikontra iti maysa nga agnaed iti Barangay Margaay, Narvacan a sinukisok ti kapolisan ti balayna idi agsapa ti Hulio 18.

Iti dayta a panagsukisok, nakakumpiska dagiti nagtitipon nga elemento ti Narvacan police station, PIB, ken ISPPSC, iti balay ni Elmeraldo Callo y Bayugo kadagiti bala para iti nadumaduma a kalibre ti paltog a pakaibilangan ti dua a bala para 12 gauge shot gun, 5 a bala para M16 rifle, 4 bala para caliber .38, ken maysa a naiputok a cartridge para caliber .38 a naikabil iti uneg Orocan rice container.

Imet dagiti operatiba idi napanda nagsukisok ti search warrant nga inyisio ni Judge Mario Anacleto M. Bañez ti Regional Trial Court Branch 25, Tagudin, Ilocos Sur.#