Lalaki, napaltogan

NARVACAN, Ilocos Sur – Maysa a lalaki ti napaltogan sadiay Zone 5, Barangay Paratong ditoy nga ili idi bigat ti Mayo 23.

Nainaganan ti biktima a ni Ernest Cabalongan Cambe, 46, addaan asawa ken agnaed iti nadakamat a barangay. Nabigbig met ti nangpaltog kenkuana a maysa nga Edward Lazo, 33, balo, mannalon ken kalugaran met laeng ti biktima.

Naammuan iti inisial nga imbestigasion nga idi agarup alas 8:43 ti bigat ti nadakamat a petsa, mapapati a nalabsan ti biktima a nakalugan iti XRM a motorsiklo ti suspek ket naparnuay ti panagsubang ken panagkinnaritda.

Mapapati nga inasut ti suspek ti paltogna ket pinaltoganna ti biktima a nagsagrapan daytoy iti dunor iti siketna.

Nakapaglemmeng ti biktima ket naglibas ti suspek, kuyogna ti paltogna.

Intaray dagiti nagresponde a polis ti biktima iti Central Ilocos District Hospital.

Nakasarak dagiti inbestigador iti dua a kapsula, maysa a bala ken magasin ti Cal. 45 iti nakapasamakan ti pammaltog.

Iti pannakaisurat daytoy, di pay nabirokan dagiti polis ti suspek.#