Lalaki, napaltogan gapu iti nadadael a bomba ti danum

STA. MARIA, Ilocos Sur – Naglalaaw ken nagpabasol gapu iti pannakaperdi ti pagbombana iti danum ket pinaltoganda la ket ngarud.

Napaltogan ni Jimmy Escobar, 38, naasawaan ken residente iti Cabaroan daytoy nga ili babaen ken ni Ellix Berama, taga-Abra ngem agnaeden iti nasao a barangay a mapapati a napasugkian iti panaglalaaw ken panagpabasol ti biktima iti nadadael a water pump.

Segun iti report, kinomprontar ti suspetsa ti biktima a nakaiggem iti paltog gapu iti panagpabasol ti naud-udi iti nadadael a pagbomba iti danum a nagtungpal iti panagbinnarada.

Naggabbo dagiti dua ket mapapati a nakalbit ti suspetsa ti paltog a nakapuntaan ti kiday ti biktima.

Naglibas ti suspetsa  a kuyogna ti paltog kalpasan ti insidente idinto a naitaray ti biktima iti Reyes Clinic and Hospital para iti pannakaagasna.