Lalaki, napaltogan gapu iti puto

NARVACAN, Ilocos Sur – Puto ti mapapati a nakagapu iti pannakapaltog ti maysa a lalaki iti asideg ti Simbaan Katoliko iti Barangay San Jose ditoy nga ili itay nabiit.

Nainaganan ti biktima a ni Silverio Supnet, 31, residente iti Marozo, Narvacan, Ilocos Sur idinto a nabigbig ti suspek a ni Oscar Valera, 63, residente iti Orence, Narvacan, Ilocos Sur.

Segun iti inbestigasion, gumatgatang ti suspek iti puto idi simmangpet ti biktima, kaduana ti grupona ket gumatangda met iti puto.

Mapapati nga adda saan a nagkinnaawatan ti suspek ken ti biktima ket pinaltogan ti immuna ti naudi a nakasugatan ti ramay ken sellang ti biktima.

Mapapati a kalibre 45 ti naaramat iti pammaltog.#