Lalaki, napaltoganna ti sakana

SINAIT, Ilocos Sur – Kakabagianna ti kainninomna ngem nagtigapaltog latta daytoy a lalaki. Dayta, napaltoganna la ket ngarud ti sakana idi napan immisbo.

Nabigbig ti biktima a ni Edmar Angeles y Basuel, 42, naasawaan, mannalon, ken residente iti Barangay Sabangan, Sinait, Ilocos Sur.

Segun iti report, naggiinom ti biktima ken dagiti kabagianna iti balay ti kabsatda a babai ngem adda sakbit ni Angeles a paltog.

Idi napan immisbo ti biktima iti paraangan, inuksotna ti paltogna ngem aksidente a nakalbitna ti gatilio ket nagkanalbuong a nakatamaan ti makannigid a sakana.

Saan a narekobre ti paltog a mapapati a maysa a Gauge 12 buckshot kas maibatay iti dua a pellet a naibunubon iti makannigid a sakana.#