Lalaki, napan naganawa, nakatagbat la ket ngarud

CABUGAO, Ilocos Sur – Dika aganawa iti nabartek ta dikanto maisarsarak.

Leksion daytoy ni Cipriano Garcia y Riopta, residente iti Barangay Turod ditoy nga ili gapu ta idi pinadasna nga anawaen ni Andrew Soller y Pablico, addaan legal nga edad, umel, gapu iti panagprobokarna iti balayda idi agarup 9:00 ti rabii ti Marso 6, nagtungpal ketdi a nakatagbat.

Segun iti report, nabartek ni Soller ket nagprobokar iti balayda ket napan naganawa ti suspek ngem aksidente a natagbatna ti biktima iti makannigid a pispis ken makannigid a takiag daytoy.

Naitaray ni Soller iti Pira Clinic and Hospital idinto a naikustodia ni Garcia iti police station.

Narekobre met dagiti inbestigador ti bolo nga agatiddog iti 21 pulgada no mairaman ti pagiggaman ket addan iti ikut dagiti polis.#