Lalaki, napang-or iti tako

NARVACAN, Ilocos Sur –   Maysa a lalaki ti pinang-or ti kaay-ayamna iti tako ti biliar a nakasugatan ti ulona.

Napang-or iti tako ni  Jovenniano Ampo, Jr., 26,  residente iti barangay San Antonio ditoy bayat ti panagay-ayamda iti biliar ken ni Edwin Comiso, Jr., alias Kuppit, kalugaran met laeng ti biktima, iti tiendaan publiko ditoy.

Saan a nailanad iti police blotter no apay a pinang-or ni Comiso ti biktima iti tako ti biliar.

Naipan ti biktima iti Central Ilocos Sur District Hospital para iti pannakaagas ti dunorna iti ulo.

Kabayatanna, nagpulong iti polis ni  Leticia Cabaccang, naasawaan, ken residente iti Orence, Narvacan, gapu iti pannakatakaw ti CD component ken DVD playerna nga adda iti uneg ti banana cue stand.

Nakastrek dagiti mannanakaw iti uneg babaen ti panangdadaelda iti padlock ti pagtagilakuan.#