Lalaki, nasamsam granada iti ikutna

STA. CRUZ, Ilocos Sur – Tiniliw dagiti barangay tanod ti maysa a lalaki nga adda ikutna a granada bayat ti panagpatroliada iti Sitio Pantar, Barangay Villahermosa ditoy nga ili idi rabii ti Enero 12.

Nagresponde dagiti polis kalpasan a nakaawatda iti tawag manipud ken ni Mayor Valle mainaig iti kaadda ti natiliw a lalaki nga agwalangwalang iti nadakamat a lugar a nakalugan iti Hyundai Grace van nga addaan iti plaka a WSY 386 iti agarup alas 9:45 ti rabii ti nadakamat a petsa.

Nasamsam ti maysa a granada iti ikut ni Sonny Almo y Peralta, 33, naasawaan, residente iti Barangay Capariaan ditoy met laeng nga ili.

Nagsuspetsa dagiti tanod gapu iti suspetsoso a gargaraw ti suspek ket pinasardengda ti suspek sada sinukimat ti lugan a nakasamsamanda iti maysa a granada.

Iti pannakaisurat daytoy, madama ti inbestigasion mainaig iti nasao nga insidente.#