Lalaki, nasarakan a nakabitin iti kayo

SANTA, Ilocos Sur – Maysa a lalaki ti nasukalan nga agbitbitin iti kayo a naparautan iti lanut ti tengngedna idi bigat ti Mayo 18 iti igid ti baybay a sakup ti Sitio Pideg, Barangay Magsaysay District ditoy nga ili.

Iti pannakaisurat daytoy, awan pay ti nangtunton iti bangkay a naabungotan ti matana iti asul a panio ken nakasango iti daya idi masarakan iti agarup 10:40 ti bigat ti nadakamat nga aldaw..

Nailadawan ti lalaki nga agtayag iti 5’8”, 30-45 ti tawenna, kalkalaingan ti kababagina, pamudawen, kulot ti buokna ken addaan iti barbas, ken nakaaruat iti amarilio nga underwear shirt ken asul a t-shirt nga adda naimaldit a tribal, ken asul a maong a jeans.

Naipan ti bangkay iti Pineda Funeral Homes, Bantay, Ilocos Sur para iti pannakaautopsiana.#