Footer

Lalaki, nasukalan a nagtagiarmas iti videoke bar

CANDON CITY – Iti baet ti kampania ti kapolisan maikontra iti panagikuyog iti armas kadagiti pagginuman ditoy siudad, adda latta dagiti natured nga aglabsing iti paglintegan.

Sakit iti ulo ita ni Marcos del Rosario y Valdez, 44, naasawaan, residente iti Barangay Amguid ditoy siudad ti panangisalpak ti polis kenkuana ti kaso a panaglabsing iti RA 1866 as amended by RA 8294.

Segun iti report, bayat ti panangisayangkat dagiti polis ditoy siudad iti Operation Bakal/Sita iti RM/Grandestella Videoke Bar idi rabii ti Enero 22 babaen ti panangidaulo ni PCI Mar Louise T. Bundoc, nasiputanda ni del Rosario nga adda inpaknina a nangisit a belt bag iti rabaw dagiti kahon dagiti nagawangan a botelia.

Sinurot dagiti polis ti suspek ket idi sinukimatda ti bag, naduktalanda a naglaon iti maysa a cal. 45 Norinco pistol nga addaan iti 2 a magazine clips ken 21 bala ken 9 a kapsula iti isu met laeng a kalibre.

Nupay adda lisensia ti suspek, awan ti naipakitana a permit to carry firearm iti ruar ti residensiana.

Naipan ni del Rosario iti police station ken nakumpiska ti paltogna ken magasin clips.

Kabayatanna, maysa a di pay nabigbig a lalaki ti nasalamaan dagiti barangay tanod a nagtagiimet iti armas ngem nakalibas daytoy idi simmangpet dagiti nagresponde a polis.

Segun kada Rogelio Soria ken Rolando Meneses, agpada a barangay tanod, nakitada ti lalaki a dimsaag iti traysikel nga adda iggemna a cal. 5.56 M-16 armalite rifle nga addaan iti long magazine a naglaon iti 28 a bala sa napan iti waiting shed a nagtakderanna iti aganay a 20 minutos.

Nagtaray ti suspek a kimmamang iti kamaisan idi simmangpet dagiti polis.

Kinuna dagiti tanod a sangsangaili ti lalaki. Di pay ammo no ania ti panggepna ken sino ti inur-urayna.#