Lalaki, nasukalan nga agtaktakaw iti kalding

SANTIAGO, Ilocos Sur Taga-probinsia ti Abra ti naipiskot a nagtakaw iti kalding iti Barangay Imus ditoy nga ili idi malem ti Disiembre 8.

Nabigbig ti suspek a ni Edgardo Gazmen y Bicarme, 37, naasawaan, ken residente iti Barangay Palao, Bangued, Abra.

Nasiputan ni Severino Galicia y Galope, 45, naasawaan, barangay kagawad ken residente iti Barangay Langlangca 2nd, Candon City, ti suspek a nangikarga iti kalding iti maysa a Hyundai van ket nagpatulong iti maysa a tricycle driver sada kinamat ti suspek agingga a naipiskotda iti Barangay Imus.

Babaen ti tulong ti dua a reserved officers, tiniliw da Galicia ti suspek sada impaima kadagiti nagresponde a polis.

Idi agsukimat dagiti polis, uppat a kalding a mapattapatta nga agbalor iti P8,000.00 ti nakitada a kinarga ti van a mapapati a tinakaw ti suspek iti nasao a barangay.#