Lalaki, natagbat gapu iti sprayer

CANDON CITY – Natagbat ti maysa a residente iti Barangay Oaig Daya ditoy siudad idi Septiembre 11 gapu iti mapapati a napukaw a knapsack sprayer.

Naireport iti polis ditoy a tinagbat ni Hermenio Alcantara, 36, residente iti nadakamat a barangay, ti kalugaranna a ni Ismael Gaboy, 61, a pinabasolna a nangala ti mapukpukaw nga sprayerna.

Naammuan iti inbestigasion dagiti polis a magmagna ti biktima iti barangay road idi inasitgan ti suspek sana sinalangad mainaig iti mapukpukaw nga sprayer a nagtungpal iti panagsubangda.

Mapapati a tinagbat ti suspek ti biktima ngem nalisian daytoy ket naginnagawanda ti buneng a nakasugatan ti kannigid nga ima ti biktima.

Nagtaray a naglibas ti suspek ngem tiniliw dagiti barangay tanod.#