Lalaki, natiliw a makitongtong-it

CANDON CITY – Nasalamaan dagiti polis ti tallo a lallaki nga agtotong-it ngem nagtataray dagitoy ket maysa laeng ti natiliwda.

Tiniliw dagiti polis ni Rolly Samling y Sarhento, 30 naasawaan, ken residente iti Barangay Balidbid, Salcedo, ken kinumpiskada dagiti pusta a tinarayan dagiti agsusugal a pakairamanan ti maysa a P10.00, P5.00, baraha, ken karton a nagbalin a lamisaanda.

Nasalamaan dagiti polis ni Samling ken dua pay a katongtong-itna ngem nakataray dagiti dua idi immasideg dagiti polis.

Naipan dagiti nakumpiska a kuarta ken ni Samling iti police station.#